Bugun Vetnamning 23 yoshgacha futbolchilardan tashkil topgan terma jamoasi sensatsion ravishda Osiyo chempionati finaliga yo‘l oldi.
Turnirning asosiy favoriti sanalgan Qatarga qarshi yarim final o‘yinining asosiy vaqtida 2:2 hisobidagi durang qayd etildi. Qo‘shimcha bo‘limlarda hisob o‘zgarmagach, penaltilar seriyasi boshlandi va unda vetnamliklar omadliroq chiqishdi.
Chorak finalda Vetnam Iroq bilan 3:3 hisobida durang o‘ynab, penaltilar seriyasida ustun kelgandi.
Terma jamoaning muvaffaqiyati Vetnamda katta voqeaga aylandi. O‘yinni stadionlarga yig‘ilib tomosha qilgan futbol muxlislari g‘alabadan keyin ko‘chalarda bayram qilishdi.
Ma'lumot uchun, Vetnam turnir finalida, 27 yanvar kuni O‘zbekiston vakillariga qarshi maydonga chiqadi.
