Rim papasi Erdo‘g‘an bilan uchrashdi va unga sovg‘a berdi

Rim papasi Frantsisk Vatikanda Turkiya prezidenti Rajab Toyyib Erdo‘g‘anni qabul qildi. Bu haqda Reuters xabar bermoqda.

Erdo‘g‘an pontifik bilan suhbatdan avval Yaqin Sharq hamda Al-Quds bilan bog‘liq vaziyatni muhokama qilish istagida ekanini ma'lum qildi.

Agentlikning ta'kidlashicha, Frantsisk va Erdo‘g‘an taxminan 50 daqiqa yakkama-yakka suhbatlashgan. Rim papasi muzokaralardan so‘ng Turkiya prezidentiga farishta va ajdaho tasvirlangan bronza medalonni hadya qildi.

«Bu tinchlik farishtasi, u urush iblisini bo‘g‘moqda. Bu tartib va adolat asosiga qurilayotgan tinchlik timsoli», - deya aytib o‘tdi Frantsisk.

Erdo‘g‘anning Vatikanga tashrifi kichik norozilik aksiyasi bilan kechdi, unda kurdlar va ularning tarafdorlari ishtirok etdi. Politsiya tartibsizliklarga yo‘l qo‘ymaslik uchun Turkiya yetakchisi boradigan joylarni o‘rab oldi.