Qoʻshimcha funksionallar
-
Tungi ko‘rinish
Urbi et Orbi: Lev XIV Rossiya va Ukrainani muloqotni boshlashga chaqirdi
Moskva va Kiyev Ukrainadagi urushni yakunlash uchun “samimiy, to‘g‘ridan to‘g‘ri va hurmatga asoslangan muloqot” olib borishga jasorat ko‘rsatishi kerak, dedi Rim papasi Lev XIV. Ilgari u Rojdestvo arafasida RFni o‘t ochishni to‘xtatishga chaqirgan edi.
Foto: Yara Nardi/REUTERS
Rim papasi Lev XIV Rossiya va Ukrainani urushni tugatish bo‘yicha muzokaralarga kirishishga chaqirdi. “Biz azob chekkan Ukraina xalqi uchun duo qilamiz: qurollar ishlatilishi to‘xtasin. Xalqaro hamjamiyat ko‘magida mojaroga tortilib qolgan tomonlar samimiy, to‘g‘ridan to‘g‘ri va hurmatga asoslangan muloqot uchun o‘zida jasorat topsin”, — dedi pontifik 25 dekabr, payshanba kuni an’anaviy rojdestvolik Urbi et Orbi (“Shaharga va dunyoga”) murojaatida.
Lev XIV murojaat matnini Vatikandagi sobor balkonidan o‘qib eshittirdi. Uni maydonga to‘plangan yuzlab kishilar tingladi. Murojaat matni Rim papasi matbuot xizmati tomonidan e’lon qilindi.
Dunyoning boshqa hududlari haqida gapirar ekan, papa Yaqin Sharqdagi nasroniylarni qo‘llab-quvvatlashini bildirdi va “Livan, Falastin, Isroil va Suriya uchun adolat, tinchlik va barqarorlik”ka chaqirdi. Murojaatda pontifik Sudan, Janubiy Sudan, Mali, Burkina-Faso, Kongo Demokratik Respublikasi, Gaiti, Myanma, Tailand va Kambodjadagi odamlarning azob-uqubatlarini ham tilga oldi.
23 dekabr kuni Rim papasi RF armiyasini o‘t ochishni to‘xtatishga chaqirgan. “Meni juda qayg‘uga soladigan narsalardan biri — Rossiya, aftidan, o‘t ochishni to‘xtatish talabi(ni) rad etganidir”, — deb qo‘shimcha qilgan edi Lev XIV o‘shanda.
Shu orada Rossiya Ukraina hududlariga zarba berishni davom ettirdi. 25 dekabr kuni tungi hujumlar oqibatida mamlakatning bir necha viloyatida kamida to‘rt kishi halok bo‘lgan, 19 kishi yaralangan.
