Islandiyada kriptovalyutalar mayningi uchun mo‘ljallangan 600 ta kompyuter o‘g‘irlab ketildi

Islandiya politsiyasi mamlakatning turli joylarida joylashgan bir nechta ma'lumotlar markazlaridan kriptovalyutalar mayningi uchun mo‘ljallangan 600 ta kompyuterni o‘g‘irlagan jinoyatchilarni 3 oydan beri izlamoqda. 

AP axborot agentligining ma'lum qilishicha, kompyuterlarning umumiy qiymati 2 mln dollarga yaqinni tashkil qiladi. O‘g‘riliklar dekabr va yanvarda amalga oshirilgan, biroq politsiya jinoyatchilarni ushlashiga umid qilgan holda bu ma'lumotni oshkor qilmagan. Hozirda tergov davomida 11 kishi, jumladan markazlardan birining qo‘riqchisi hibsga olingan.     

“Bu o‘g‘rilik avval bu yerda misli ko‘rilmagan katta ko‘lamdagi o‘g‘rilikdir. Barchasi buni uyushgan jinoiy guruh amalga oshirganiga ishora qilmoqda”, deb aytgan 4 ta o‘g‘rilikdan 2 tasi amalga oshgan Reykyanes oroli politsiyasi komendanti Olafur Xelgi Kyartenson.