Yevropa politsiyasini ilk bor ayol kishi boshqaradi

Yevropa Ittifoqi kengashi 8 mart kuni ilk bor ayol kishini Yevropa politsiyasi – Yevropolning ijrochi direktori etib tayinladi. Bryusselda 8 mart kuni o‘tgan Yevropa Ittifoqining ichki ishlar va adliya kengashining yig‘ilishida qabul qilingan qarorga ko‘ra, bu lavozimni Belgiya federal politsiyasi bosh komissari Katrin de Boll egallagan.

“Mening bu lavozimdagi asosiy vazifam agentlikka ishonch va uning ishi samaradorligini oshirishdan iborat bo‘ladi”, deb aytgan de Boll yangi lavozimga tayinlangandan keyin.

U o‘z vazifalarini bajarishga 1 maydan kirishadi va Rob Ueynrayt o‘rnini egallaydi. Yevropol rahbari 4 yillik muddatga tayinlanadi.

48 yoshli Katrin de Boll ixtisosligi bo‘yicha huquqshunos bo‘lib, dastlab jandarmeriya, so‘ngra kriminal politsiya zobiti bo‘lgan. U Belgiya federal politsiyasini 2012 yildan boshqarib kelgan va bu lavozimga tayinlangan ilk ayol bo‘lgan.