Andijon shahridagi “Toshkent premium” hamda “Andijon” tantanalar saroyida “O‘zbekiston Qur'on musobaqasi-2018”ning viloyat bosqichi o‘tkazildi.
Musobaqaning 1-bosqichida 1200 nafarga yaqin andijonlik qori va qoriyalar ishtirok etib, viloyatning shahar va tumanlarida g‘oliblikni qo‘lga kiritgan 27 nafar erkak va 17 nafar ayol-qizlar Respublika musobaqalariga yo‘llanma olish uchun bellashishdi.
Tadbir avvalida viloyat hokimi Shuhratbek Abdurahmonov, viloyat bosh imom-xatibi Nuriddin Holiqnazarov hamda O‘zbekiston Musulmonlar Idorasi vakillari ishtirokchilar oldida so‘zladilar.
Hifz va tilovat yo‘nalishidagi qorilar o‘rtasidagi bellashuvlar “Toshkent premium” binosida, qoriyalar o‘rtasidagi musobaqalar esa “Andijon” tantanalar saroyidagi ko‘plab tamoshabinlar ishtirokida o‘tkazildi.
Musobaqani jonli tarzda kuzatib borishni xohlaganlar uchun har ikki bino tashqarisiga katta ekranlar o‘rnatildi.
KUN.UZ muxbiri Elmurod Ermatov, Andijon
