Rossiyadan Qozog‘istonga yirik partiyadagi nefritni olib chiqishga urinish oldi olindi  

 Rossiya huquq-tartibot idoralari va bojxona xodimlari Qozog‘iston bilan chegarada  Rossiyadan qiymati 12 mln rubllik 3 tonnaga yaqin nefrit mineralini olib chiqishga urinish oldini olishdi. Bu haqda Rossiya ichki ishlar vazirligi rasmiy vakili Irina Volk ma'lum qildi.  

“Rossiya chegarasi orqali yirik partiyadagi nefritni noqonuniy olib o‘tishga urinishning oldi olindi”, deb aytgan Volk.

Uning aytishicha, yaqin xorijiy davlatlardan birining 34 yoshli fuqarosi nefritni yuk mashinasida qurilish toshi ko‘rinishida olib chiqmoqchi bo‘lgan.  

Ushbu holat yuzasidan gumonlanuvchiga nisbatan Novosibirsk viloyati bosh tergov boshqarmasi tomonidan jinoiy ish qo‘zg‘atilgan.

Nefrit yarim qimmatbaho tosh hisoblanib, ko‘rinishi sababli shunday nom olgan.  Nefritning daryo suvi bilan silliqlangan kichik bo‘laklari inson buyragini (yunonchadan nefro – buyrak) eslatib yuboradi.