Rossiya prezidenti Vladimir Putin AQSh yetakchisi Donald Tramp bilan uchrashuv o‘tkazishga tayyor. Bu haqda RF tashqi ishlar vaziri Sergey Lavrov ma'lum qildi, deb xabar bermoqda RIA «Novosti».
Vazir ikki yetakchining uchrashuv o‘tkazish imkoniyati haqida gapirib, Oq uy tomonidan Trampning bu boradagi rejalari rasman tasdiqlanishiga izoh berdi.
«Prezident Putin bunday uchrashuvga tayyor», - deya ma'lum qilgan Lavrov.
Shu bilan birga, uning ta'kidlashicha, hozirgi paytda bunday uchrashuvga tayyorgarlik ketayotgani yo‘q.
«Biroq agarda bu ro‘y bersa, qandaydir o‘zgarish kuzatilsa, biz albatta sizga aytamiz. Biroq men shunga e'tibor qaratmoqchi edimki, Donald Tramp ushbu telefon muloqotidan so‘ng bir necha marta ham tvitlarida, ham bayonotlarida Rossiya bilan masalalarni hal qilish lozimligi, Rossiya bilan yaxshi munosabatlarni xohlayotgani haqida ma'lum qildi. Bu yaxshi munosabatlarga ega bo‘lmaslikdan ko‘ra yaxshiroq. Biz ham barchasini eshitmoqdamiz», - deya qayd etib o‘tgan Rossiya TIV rahbari.
