Asli Bombey shahrida yashovchi hindistonlik Ashok Kumar ancha yillardan buyon oila a'zolari bilan Markaziy Osiyodagi Samarqand, Toshkent va Farg‘ona vodiysiga sayohat qilishni orzu qilardi. Sababi, ularning hayotida tanish bo‘lgan Boburiylar sulolasining tarixi bu hududlar bilan bog‘langan.
Shunday qilib, Kumarlar sayyohlik dasturlariga jiddiy qiziqa boshlashdi. Do‘stlarining taklifi bilan Manipur shtatining markazi Imphal shahridan “Londonga yo‘l” dasturi orqali Buyuk Britaniyagacha yo‘l-yo‘lakay barcha tarixiy shaharlarda to‘xtash g‘oyasi Ashokni qiziqtirib qo‘ydi.
Bu dasturga ular orzu qilgan Markaziy Osiyo shaharlariga tashriflar kiritilgandi. Shu qiziqish bilan Kumarlar oilasi Road to London 2018 dasturiga qo‘shilib olishdi.
Road to London 2018 o‘zi qanday dastur hisoblanadi?
Bu dastur avtomashinalar orqali dunyoning deyarli yarim qismini bosib o‘tishga mo‘ljallangan sayohat hisoblanadi.
• Masofa: 16000 km;
• Boriladigan davlatlar soni: 18 ta;
• Dastur davomiyligi: 49 kun;
• Ishtirokchilar soni: 27 nafar
12 may kuni Hindistonning O‘zbekistondagi elchixonasi bir guruh vatandosh sayohatchilarni poytaxtimizda kutib oldi. Sayohatchilar sharafiga Toshkent shahridagi Le Grande Plaza mehmonxonasida badiiy kecha uyushtirildi. Tadbirda OAV vakillari, shuningdek, Kun.uz tahririyati ham mehmon bo‘ldi.
Ashok Kumar bilan suhbatimizda, ular kuni kecha Farg‘ona vodiysining shirin mevalaridan bahramand bo‘lganligini eslashdi. Ularning keyingi manzili esa “Sayqali ro‘yi zamin” – Samarqand.
