Moskvaning Sheremetevo aeroportida Londonning “Arsenal” klubi va Nigeriya terma jamoasining sobiq futbolchisi Nvankvo Kanudan 11 ming dollar o‘g‘irlash gumoni bilan ikki nafar yukchi qo‘lga olindi.
Kanu Londondan Moskvaga kelgan va u yerdan Kaliningradga uchib ketgan. Kaliningraddagi Xrabrovo aeroportida u yukini olgan, biroq mehmonxonada puli yo‘qolganini aniqlagan.
Kaliningradda 16 iyunda Nigeriya terma jamoasi jahon chempionati doirasida Xorvatiya bilan uchrashadi.
41 yoshli Kanu Nigeriya terma jamoasi safida 1994 yildan 2011 yilgacha to‘p surgan. U, shuningdek, “Ayaks”, “Inter”, “Arsenal”, “Vest Bromvich” va “Portsmut” klublari sharafini himoya qilgan.
Ushbu holat yuzasidan jinoiy ish qo‘zg‘atilgan. Ta'kidlanishicha, o‘g‘irlangan pullar tez orada egasiga qaytariladi.
