Italiyada avtomobillaridan velosiped foydasiga voz kechadiganlar moliyaviy rag‘batlantiriladi

Italiya shimolidagi Chezena shahri ma'muriyati shaxsiy avtomobilida yurishdan velosipedda yurish foydasiga voz kechadiganlarni moliyaviy rag‘batlantirishga qaror qildi.

Endilikda ishiga velosipedda borib-keladiganlarga bosib o‘tgan har bir kilometr yo‘li uchun 25 sent to‘lanadigan bo‘ldi. Biroq to‘lanadigan pul miqdori cheklab qo‘yilgan – umumiy summa oyiga 50 yevro yoki kuniga 2,5 yevrodan oshmasligi kerak, deb xabar bermoqda Il Messaggero nashri.

Italiya atrof-muhit vazirligi tomonidan ishlab chiqilgan ushbu tajriba 2018 yil noyabrgacha davom etadi. Uning yakuniga ko‘ra bunday amaliyotni butun Italiya bo‘ylab qo‘llash bo‘yicha qaror chiqariladi. Boshlang‘ich dasturga 90 ming yevro ajratilgan.

Odamlar avtomobillaridan voz kechib, velosipedda bosib o‘tadigan yo‘l smartfonlar uchun yaratilgan maxsus dastur yordamida hisoblab boriladi. Dasturda ishtirok etish uchun shahar ma'muriyatida ariza to‘ldirish kerak bo‘ladi.