Bojxonachilar 3,6 milliard so‘mlik «kepak» operatsiyasini fosh etishdi

Davlat bojxona qo‘mitasi Kontrabanda va bojxona qonunchiligi buzilishiga qarshi kurashish boshqarmasi xodimlari tomonidan o‘tkazilgan tezkor tadbir davomida O‘zbekistonga yirik miqdordagi tovar-moddiy boyliklarni noqonuniy olib kirishga bo‘lgan urinishlarga chek qo‘yildi. Bu haqda Davlat bojxona qo‘mitasi axborot xizmati xabar bermoqda.

«Qo‘shni davlatdan «S.Najimov» chegara bojxona posti orqali respublikaga kirib kelgan fuqaro T.X boshqaruvidagi «Volvo FM 12» rusumli hamda fuqaro A.A.boshqaruvidagi «Scania Nederland» rusumli yuk avtoulovlari bojxonachilar tomonidan to‘xtatilib, bojxona nazoratidan o‘tkazildi.

Ushbu yuk avtoulovlari haydovchilari tomonidan bojxona organiga taqdim etilgan soxta hujjatlarda yuk jo‘natuvchi korxona nomidan yuk qabul qiluvchi nomiga go‘yoki «bug‘doy kepaklari» tovarlari yuborilgani qayd etilgan edi.

Ammo, ushbu avtoulovlar yukxonalarini ko‘zdan kechirish natijasida hujjatlarda ko‘rsatilgan «bug‘doy kepagi» tovarlari umuman yo‘qligi va aksincha ularning o‘rnida qiymati 3,6 milliard so‘mlik 241 xil turdagi xalq xo‘jalik mollari va kimyoviy suyuqliklar borligi aniqlanib, ashyoviy dalil sifatida olindi.

Hozirda ushbu holat yuzasidan jinoyat ishi qo‘zg‘atilib, tergov harakatlari olib borilmoqda», deyilgan xabarda.