Rossiyaning Yekaterinburg shahrida Interpol xodimlari transport politsiyasi xodimlari bilan hamkorlikda odam savdosi va qotil yollashda ayblanib qidiruvda bo‘lgan o‘zbekistonlik ayol qo‘lga olindi. Nakanune.RU nashrining xabar qilishicha, ayol tez orada Gruziyaga topshiriladi.
Ekstraditsion tekshiruvda aniqlanishicha, ayol 2012-2013 yillarda Gruziyaga kelgan va to‘rt nafar vatandosh qizlarni yuqori maosh va'da qilib Gruziyada ishlashga taklif qilgan. Qizlar kelishgach, ularning pasportlarini olib qo‘ygan va fohishalik bilan shug‘ullanishga majbur qilgan. Qizlardan biri u haqida politsiyaga shikoyat qilishini aytib qochishga uringanida ayol qizni o‘ldirish uchun qotil yollagan va o‘zi Rossiyaga qochib ketgan.
Rossiya bosh prokurori o‘rinbosari Gruziya adliya vazirligining ayolni Gruziyaga topshirish haqidagi so‘rovini qanoatlantirgan.
