OAV: Xitoy dunyo bo‘ylab harbiy qudratini kengaytirishni rejalamoqda

Xitoy butun dunyoda milliy strategik manfaatlarini himoya qilish maqsadida harbiy qudratini kengaytirishni rejalashtirmoqda. Bu haqda Japan Times nashri yozmoqda. 

Ta'kidlanishicha, hujjatlarda Sharqiy Xitoy va Janubiy Xitoy dengizlari mintaqasida, shuningdek, AQSh va qo‘shni mamlakatlar, jumladan Yaponiya bilan keskinlikning kuchayib borayotgani haqida so‘z borgan. 

Ushbu hujjat XXR Markaziy harbiy komissiyasida tarqatilgan. Manbaga ko‘ra, harbiy qo‘mondonlik va boshqaruv tizimi 4 darajali tuzilmadan 3 darajaliga o‘zgartiriladi, strategik doktrinaga ham tuzatishlar kiritilishi kerak.  

Hujjatda strategik front borasida aytilishicha, garchi Xitoy xalq ozodlik armiyasi qirg‘oq mudofaasida jangovar shayligi yuqori bo‘lsa-da, u quruqlik va havoda o‘zining amaliyotlar hududidan tashqarida ham salohiyatini mustahkamlashi talab etiladi. 

Yangi davr talabidan kelib chiqqan holda tuzatishlar kiritilgan harbiy strategiya «inqirozni yanada yaxshiroq boshqarish, mojaroni to‘xtatib qolish, urushda g‘alaba qozonish, Xitoy kommunistik partiyasi va rais Si Tszinpin tomonidan ilgari surilganidek, mamlakatning strategik manfaatlarini har tomonlama kengaytirish va maqsadlarni amalga oshirish» imkonini beradi.