Reuters: shifokorlar Tailanddagi g‘ordan qutqarilgan bolalarda kasallik aniqlanmaganini aytishdi

Shifokorlar Tailanddagi g‘orda ikki haftadan ortiq qolib ketib qutqarilgan bolalarda kasalliklar aniqlanmaganini bildirishdi. Reuters agentligining xabar berishicha, ularda bezgak alomatlari topilmagan, ko‘krak qafasi rentgeni natijalari bir kun avvalgisiga nisbatan yaxshi chiqqan.

Tailand sog‘liqni saqlash vazirligi vakilining so‘zlariga ko‘ra, infeksiya alomatlari mavjud bo‘lgan barcha qutqarilganlar kamida yetti kun kasalxonada bo‘ladi. Shifokor ikkinchi guruhda ham "jiddiy infeksiya alomatlari topilmaganini" aytdi. Uning aytishicha, evakuatsiya qilingan so‘nggi besh kishi, to‘rt o‘quvchi va murabbiyning ham ahvoli yaxshi. Ammo ularning kasalxonadan qachon chiqishlari muddati hozircha aniq emas.

"Bolalar g‘or ichida bir-birlariga judayam g‘amxo‘rlik qilishgan ko‘rinadi, - dedi shifokor. – Ularning ahvoli yaxshi, zo‘riqish alomatlari yo‘q, faqat bolalarning aksariyati o‘rtacha ikki kilodan ozishgan".

Sog‘liqni saqlash vazirligi bolalar topilgan 2 iyuldan buyon ular bilan birga bo‘lgan vrach va uch g‘avvos mutaxassislar nazoratida bo‘lishini ma'lum qildi.
Avvalroq 8 iyul kuni qutqarilgan birinchi guruhdagi bolalarning ota- onalariga ularni quchoqlash man etilganligi xabar qilingandi.