XPKda JCh-2018ning O‘zbekiston hududida efirga uzatilishi yakunlari muhokama etildi

Bugun, 16 iyul kuni Toshkentda Xalqaro press-klub va UzReport axborot agentligi (UZREPORT TV va FUTBOL TV telekanallari) tomonidan «Jahon chempionati – 2018: millionlar o‘yini, jonli translyatsiya va futbol zavqi» mavzusida matbuot anjumani tashkil etildi. Tadbirda FIFA referisi Ravshan Ermatov, UzReport axborot agentligi bosh direktori Ravshanxon Jo‘rayev, taniqli futbol sharhlovchisi Davron Fayziyev hamda rossiyalik sport sharhlovchilari Denis Kazanskiy hamda Aleksandr Yelagin spiker sifatida ishtirok etdi.

Matbuot anjumanida kecha yakuniga yetgan Jahon chempionatining O‘zbekiston hududida efirga uzatilishining yakunlari muhokama qilindi. Xususan, mundial o‘yinlarini mamlakatimiz hududida translyatsiya qilish huquqini sotib olgan UzReport axborot agentligi uchun bu ilk Jahon chempionati bo‘lgani ta'kidlab o‘tildi. Agentlik bundan avvalroq Yevropa milliy chempionatlari va Yevro-2016 final bosqichini ham sifatli tasvirlarda o‘zbekistonlik tomoshabinlarga taqdim etgandi.

Kun.uz muxbirining ma'lum qilishicha, UzReport may oyi oxirlarida JChni O‘zbekiston hududida qonuniy translyatsiya qilish bo‘yicha FIFA bilan kelishuvga erishgan. Agentlik 6 oy davom etgan xalqaro tenderda g‘olib chiqib, bu huquqni qo‘lga kiritgan.

«JCh translyatsiyasi huquqiga ega bo‘lish – eng avvalo mas'uliyat, degani. Bu mas'uliyatni to‘g‘ri anglagan holda, bir qator tashkiliy ishlarni amalga oshirdik. Eng birinchi tashkiliy masala sharhlovchilar masalasi bo‘ldi. O‘yinlarni o‘zbek tilida sharhlash uchun Davron Fayziyev, Hasan Turdaliyev, Diyor Imomxo‘jayev kabi yaxshi sharhlovchilarga ega edik, biroq biz O‘zbekiston hududida yashovchi rusiyzabon aholi qatlamini ham qamrab olishni istadik. Shu maqsadda rossiyalik sharhlovchilar Denis Kazanskiy va Aleksandr Yelaginni taklif etdik. Xabaringiz bor, biz bu jurnalistlar bilan 3 yildan buyon hamkorlik qilib kelmoqdamiz», - dedi UzReport axborot agentligi bosh direktori Ravshanxon Jo‘rayev.

Toshkent shahri va viloyati miqyosida agentlik telekanallari orqali mundialning barcha 64 o‘yini yuqori aniqlikda – Full HD formatida namoyish etildi. Shuningdek, tomoshabinga sharh tilini (o‘zbek yoki rus tilini) tanlash imkoniyati taqdim qilindi. Bunday texnologik yechim MDH mamlakatlari bo‘yicha ilk bor O‘zbekistonda joriy etilgani aytilmoqda.

JChning 2ta o‘yinini boshqarib borgan Ravshan Ermatov mundialdagi ishtiroki haqida gapirib, jumladan, shunday dedi: «Terma jamoalar jahon chempionatida ishtirok etish uchun qanday murakkab saralash yo‘lini bosib o‘tishlariga to‘g‘ri kelsa, hakamlar ham xuddi shunday qiyinchiliklar bilan mundialga yetib borishadi. Ko‘pchilik o‘ylaydiki, oldingi jahon chempionatida yaxshi qatnashgan hakam bo‘lsa, keyingisiga ham osongina yo‘llanma olish mumkin. Bunday emas. Jahon futbolida hakamlar orasida ulkan raqobat mavjud».

Press-kofe formatida tashkil etilgan konferensiya davomida o‘zbek va rus sharhlovchilik maktabi hamda ular o‘rtasidagi aloqalar, O‘zbekistonda futbol translyatsiyalarining bugungi holati va soha istiqbollari kabi masalalar muhokama qilindi.