O‘zbekistonning suveren obligatsiyalari emissiyasi uchun «J.P. Morgan Chase» maslahatchi sifatida tanlandi

Tashqi moliyalashtirish manbalarini diversifikatsiya qilishning qo‘shimcha chora-tadbirlari to‘g‘risidagi Prezident qarori qabul qilindi.

Qarorga muvofiq mustaqil kredit reytingini olish va O‘zbekiston Respublikasi suveren obligatsiyalari emissiyasi uchun «J.P. Morgan Chase» boshchiligidagi banklar konsorsiumi bosh moliyaviy maslahatchi sifatida tanlandi.

Suveren obligatsiyalarini chiqarish va joylashtirish hamda mustaqil kredit reytingi olish bo‘yicha fiskal, to‘lov, transfer va listing agentlarining xizmatlari uchun haq to‘lash Moliya vazirligi huzuridagi zaxira jamg‘armasi mablag‘lari hisobidan amalga oshiriladi.

Suveren obligatsiyalarni joylashtirishdan tushadigan mablag‘lar «Obod qishloq» va «Obod mahalla» dasturlari doirasidagi ishlarni bajarishga, shuningdek boshqa infrastruktura obektlarini qurish uchun yo‘naltiriladi.

«JPMorgan Chase» - Amerikaning transmilliy investitsiya banki va moliyaviy xizmatlar kompaniyasi bo‘lib, bosh shtab-kvartirasi Nyu-Yorkda joylashgan. Tashkilot hisobidagi aktivlari miqdori bo‘yicha AQShning eng yirik bank muassasasi hisoblanadi.