Qochqinlar Suriyaga ixtiyoriy tarzda va xavfsizlik sharoitlarida qaytishlari lozim – BMT

BMT suriyalik qochqinlarning vatanlariga ixtiyoriy ravishda xavfsizlik sharoitlarida qaytishlarini qo‘llab-quvvatlaydi. Bu haqda BMTdagi brifingda xalqaro tashkilot bosh kotibining rasmiy vakili Stefan Dyujarrik “BMT Rossiya va AQSh suriyalik qochqinlarni vatanlariga qaytishi muammosini muhokama qilishida qanday rol o‘nashi mumkinligi” haqidagi savolga javoban ma'lum qildi. 

“Muzokaralar borasida hech narsa ayta olmayman. Biroq BMT qochqinlar uylariga ixtiyoriy ravishda, obro‘lari saqlangan holda va xavfsizlik sharoitlarida qaytishlari lozimligini qo‘llab-quvvatlaydi. Hech kimni qaytishga majburlash kerak emas”, deb aytgan Dyujarrik.

Suriyalik qochqinlar muammosi Rossiya va AQSh prezidentlarining Xelsinkidagi uchrashuvida muhokama qilingan. Bu haqda AQSh davlat kotibi Maykl Pompeo BMTda jurnalistlar bilan uchrashuvda ma'lum qilgandi. Uning aytishicha, gap qochqinlarning uylariga qayta olishlari uchun sharoitlar yaratish haqida borgan.