Respublikachilar Putinning AQShga kelishi mumkin ekanidan norozi 

AQSh senatidagi respublikachilar yetakchisi Mitch Makkonelning ma'lum qilishicha, Rossiya prezidenti Vladimir Putinning Kapitoliyga tashrifi ma'qullanmaydi. U Moskvani AQShdagi «bo‘lajak saylovlarga aralashmaslik» to‘g‘risida ogohlantirdi, deb xabar bermoqda Reuters.

Qo‘shma Shtatlar prezidenti Donald Tramp 16 iyul kuni Xelsinkida bo‘lib o‘tgan AQSh va Rossiya sammitidan so‘ng, Rossiya yetakchisi Vladimir Putinni Vashingtonga taklif etdi. Dastlabki ma'lumotlarga ko‘ra, tashrif kuz oylariga rejalashtirilgan. Tramp Putin bilan sammitdan keyin ikki partiya tanqidiga uchradi. Reuters’ning ta'kidlashicha, respublikachilarning ko‘pchiligi demokratlarga qo‘shilib, Tramp sammiti natijalarini tanqid ostiga oldi.

Trampning taklifi tashvishlarga ham sabab bo‘ldi, deb qo‘shimcha qilmoqda agentlik.

Bundan tashqari, AQSh vakillar palatasi spikeri respublikachi Pol Rayan Putin Trampning Vashingtonga tashrif buyurish borasidagi taklifini qabul qilsa, unda Rossiya prezidentiga kongressning qo‘shma majlisida chiqish qilish taklifi berilmasligini aytdi. Rayanning so‘zlariga ko‘ra, bunday imkoniyat faqat ittifoqchilarga taqdim etiladi.