Tanishini qasddan mashinada urib, yordam ko‘rsatish o‘rniga urib-tepib o‘limiga sabab bo‘lgan shaxs ushlandi

24 iyul kuni Qashqadaryo viloyatining Qarshi shahrida qotillik yuz berdi. Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar qilmoqda.

Qayd etilishicha, shu shaharda yashovchi Z.E. tanishi B.Q. bilan telefon orqali o‘zaro janjallashib ketayotgan vaqtida uni yo‘l chetida turganini ko‘rib qolib, o‘zining “Neksiya” rusumli avtomashinasi bilan urib, bu ham yetmagandek, avtomashinadan tushib, uning tanasini turli joylariga urib-tepib, jarohat yetkazgan.

Natijada B.Q. kasalxonaga olib ketilayotgan vaqtida vafot etgan. Z.E. esa qo‘lga olingan.