«Novichok ishi». Britaniya politsiyasi poyabzal do‘konidagi kuzatuv kameralari bilan qiziqib qoldi

Britaniyaning Uiltshir grafligi politsiyasi Charli Rouli «Novichok» asab-falajlovchi modda bilan zaharlangan kuni borgan, Eymsberi shahri markazidagi poyabzal do‘konidan videokuzatuv kameralari yozuvini oladi. Bu haqda Huffington Post yozmoqda.

Politsiya ma'lumotlariga ko‘ra, Rouli poyabzal do‘koniga 30 iyun kuni tashrif buyurgan hamda yarim soat o‘tib o‘z uyiga qaytib kelgan. Britaniyalik zobitlar himoya kiyimida do‘kondan videokuzatuv kameralari yozuvini olishadi, bu «Novichok ishi» bo‘yicha davom etayotgan tergov doirasida qilinadi. Politsiyachilar himoya kiyimini ehtiyot chorasi sifatida kiyib olishadi, deya qo‘shimcha qilgan nashr.

Bunga qadar kimyoviy himoya kostyumlarini kiyib olgan huquqni muhofaza qilish organlari xodimlari Solsberidagi «Qirolicha Yelizaveta bog‘lari» bog‘ida o‘rnatilgan umumiy hojatxonalarda «Novichok» asab-falajlovchi modda izlarini qidirishgandi.

Charli Rouli va uning tanishi Don Sterjyess 30 iyun kuni Eymsberida hushsiz holatda topildi. Britaniya politsiyasining fikricha, ular «Novichok» asab-falajlovchi moddasi bilan zaharlangan. Rouli hozirda shifoxonadan chiqarildi, Cterjyess 8 iyul kuni vafot etdi.

Eslatib o‘tamiz, avvalroq «Novichok» bilan zaharlangandan so‘ng omon qolgan britaniyalik o‘z ruhiy holati haqida gapirgandi.