O‘zbekiston va Germaniya o‘zaro hamkorlikning shartnomaviy-huquqiy asosini kengaytirishni muhokama qildi

2018 yilning 26 iyul kuni Berlin shahrida O‘zbekiston va Germaniya tashqi ishlar vazirliklari yuridik xizmatlari vakillari maslahatlashuvlari bo‘lib o‘tdi. Bu haqda TIV axborot xizmati xabar bermoqda.

Muzokaralar chog‘ida ikki tomonlama hamkorlikning shartnomaviy-huquqiy asosini kengaytirish istiqbollari muhokama qilindi.

Germaniya delegatsiyasiga TIV Xalqaro huquq departamenti direktori Gvido Xildner boshchilik qildi.

Uchrashuvda kerakli huquqiy asosni shakllantirish orqali tartibga solishni talab etadigan hamkorlik yo‘nalishlari belgilandi. siyosiy hamkorlikni mustahkamlash, transport va turizmni rivojlantirish, ta'lim va atrof muhitni himoya qilish sohalaridagi aloqalarni faollashtirishga doir tegishli shartnomalarni tuzish masalalariga alohida e'tibor qaratildi.

Ikki davlat o‘rtasida yaratilgan mustahkam shartnomaviy-huquqiy asos mavjudligini inobatga olgan holda, tomonlar imzolangan hujjatlarni inventarizatsiya qilish va uni bosqichma-bosqich amalga oshirish zarurligi bo‘yicha bir to‘xtamga keldilar.