Mahalliy darajadagi deputatlar sudlar raislarining axborotini eshitadilar

«Mahalliy davlat hokimiyati to‘g‘risida» va «Sudlar to‘g‘risida»gi qonunlarga ana shunday tuzatishlar kiritildi.  

Tuzatishlarga ko‘ra, sudlar raislari 1 yilda kamida 1 marta tegishli darajadagi vakillik organlariga sudning fuqarolar huquqlari va erkinliklarini hamda yuridik shaxslarning manfaatlarini himoya qilishga doir faoliyati to‘g‘risidagi axborotni yuborishlari shart, deb yozadi Norma.

Mazkur axborot quyidagicha taqdim etiladi:  

• Qoraqalpog‘iston Respublikasi sudi raisi tomonidan – Qoraqalpog‘iston Respublikasi Jo‘qorg‘i Kengesiga;
• viloyat sudi raisi tomonidan – xalq deputatlari tegishli viloyat Kengashiga;
• Toshkent shahar sudi raisi tomonidan – xalq deputatlari Toshkent shahar Kengashiga;
• tumanlararo, tuman (shahar) sudi raisi tomonidan – xalq deputatlari tegishli tuman (shahar) Kengashiga.
 .
Xalq deputatlari Kengashlari sudyalar taqdim etgan axborotni tinglab, mazkur masala yuzasidan o‘z qarorlarini Sudyalar oliy kengashiga yuboradilar.  
 
Eslatib o‘tamiz, Sudyalar oliy kengashi 2017 yilda mamlakatda sud hokimiyati mustaqilligining konstitutsiyaviy prinsipiga rioya etilishini ta'minlashga ko‘maklashish maqsadida sudyalar hamjamiyati organi sifatida tashkil etilgan. Uning vakolatlariga quyidagilar kiradi:

• sudyalarni intizomiy javobgarlikka tortish to‘g‘risidagi masalani ko‘rib chiqish;
• davlat rahbariga viloyatlar va Toshkent shahar sudlari raislari vakolatlarini muddatidan avval bekor qilish to‘g‘risida taqdimnomalar kiritish;
• Jo‘qorg‘i Kengesga Qoraqalpog‘iston Respublikasi sudlari sudyalari vakolatlarini muddatidan avval bekor qilish to‘g‘risida xulosalar kiritish;
• Prezident bilan kelishgan holda viloyatlar va Toshkent shahar sudlari sudyalari, tumanlararo, tuman, shahar sudlari raislari va sudyalarini lavozimdan ozod etish.
       
Shu bilan bir qatorda, viloyat, tuman va shahar darajasidagi sudyalar har oyda joylarda aholi bilan uchrashishlari, shuningdek jamoatchilikni sudning faoliyati to‘g‘risida OAV orqali xabardor qilib borishlari shart.
 
Qonun 24.07.2018 yildan kuchga kirdi.