O‘zbekistonlik chavandoz Rossiyadagi gran-prida bronza medalini qo‘lga kiritdi

Ot sportining konkur yo‘nalishi bo‘yicha «Rossiya ot sporti federatsiyasi Kubogi» chavandozlarimizga yana bir medalni taqdim etdi. Musobaqada ishtirok etish uchun Gollandiyadagi o‘quv-mashg‘ulot yig‘inlaridan yetib kelgan Oqil Sobirjonov Gran-Prida 3-o‘rinni egallab, bronza medaliga sazovor bo‘ldi.

Musobaqada Rossiya, O‘zbekiston, Belarus, Qozog‘iston va yana boshqa bir qator mamlakatlardan chavandozlar ishtirok etishdi. Oqil Sobirjonov bellashuvlarda barcha to‘siqlaridan xatolarsiz o‘tdi va terma jamoamiz hisobiga medal qo‘shib qo‘ydi.

Oqil Sobirjonov konkur bo‘yicha O‘zbekiston terma jamoasining boshqa a'zolari bilan Niderlandiyada o‘quv-mashg‘ulot yig‘inlarida ishtirok etib, jahonning ko‘zga ko‘ringan mutaxassislaridan konkur sir-asrorlarini o‘rganayotgan edi. U yerda terma jamoa a'zolari yana bir necha kundan so‘ng Jakartada start oladigan Osiyo o‘yinlariga tayyorgarlik ko‘rishmoqda.

O‘quv-mashg‘ulot yig‘inlari doirasida bir qator nufuzli musobaqalar o‘tkazilishi va ularda chavandozlarimiz ishtirok etishi rejalashtirilgan.