Baklashkalar bilan nishonga olingan «Neftchi» futbolchisi muxlislardan uzr so‘radi

Superliga 20-turidan o‘rin olgan «Neftchi» – «Navbahor» (2:1) o‘yinining 68-daqiqasida mezbonlar futbolchisi Abdurahmon Abdulhaqov gol urganidan so‘ng, «Navbahor» klubi muxlislari o‘tirgan sektor oldida golni nishonlagan va noloyiq hatti-harakatlarni qilgan edi. Shundan so‘ng, futbolchi «Navbahor» muxlislari tomonidan otilgan baklashkalar nishoniga aylandi.

Natijada PFL intizom qo‘mitasi musobaqalar reglamentining intizomiy va jarimalar kodeksi 1-qismi 5.4 bandini buzgani uchun «Neftchi» futbolchisi Abdurahmon Abdulhaqov 2 million so‘m miqdorida jarimaga tortdi.

Futbolchi o‘z qilgan ishidan afsusda ekanligini ta'kidlab, «Navbahor» muxlislaridan uzr so‘radi: 

«O‘yin vaqtida futbolchi kuchli his-xayajonlar og‘ushida bo‘ladi. Ayniqsa gol urilgan vaqtda o‘z his-hayajonlarini jilovlash biroz qiyin kechadi. Derbida jamoamiz uchun muhim bo‘lgan golni urganimdan so‘ng, mana shunday his-hayajonga berilib, beixtiyor raqib muxlislari tomon yugurdim. Bu esa noto‘g‘ri qaror edi. Shu sabab «Navbahor» jamoasi muxlislaridan bu ishim uchun uzr so‘rayman», - dedi Abdulhaqov. 

Eslatib o‘tamiz, «Navbahor» futbol klubi ham muxlislarining hulqi va madaniyati borasida tegishli tartibda ish olib bormagani uchun oxirgi marta ogohlantirilgan edi.