09:49 / 11.09.2018
4684

Buyuk Britaniyaning O‘zbekistondagi elchisi o‘zgaradi

Buyuk Britaniya Tashqi ishlar vazirligi Tim Torlotni mamlakatning O‘zbekistondagi yangi elchisi etib tayinladi. Bu haqda Britaniya tashqi siyosat idorasi xabar berdi.

Ta'kidlanishicha, Tim Torlot 2019 yilning yozida o‘z vazifalarini bajarishga kirishadi.

Buyuk Britaniyaning Toshkentdagi diplomatik missiyasiga 2015 yil kuzidan buyon rahbarlik qilib kelayotgan hozirgi elchi Kristofer Allan boshqa lavozimga o‘tadi.

Foto: Kristofer Allan

Tashqi ishlar vazirligining ma'lumotlariga ko‘ra, Tim Torlot tashqi siyosat idorasi tizimida 1981 yildan buyon ishlaydi. U Iroq, Ummon, Yangi Zelandiya, Chili va Yaman kabi mamlakatlarda ishlagan, shuningdek, Britaniya Tashqi ishlar vazirligi tuzilmasida turli lavozimlarni egallagan.

Foto: Tim Torlot

U 2016 yildan buyon hozirgi vaqtga qadar Buyuk Britaniya TIVning Arabiston yarim oroli va Eron departamentida ishlab kelmoqda.

Top