Eron Yaqin Sharqda ustunlik qilishga yaqin edi, biroq hozir vaziyat o‘zgargan – Tramp

AQSh prezidenti Donald Tramp Eron Yaqin Sharqda ustunlik qilishga yaqin bo‘lganini, biroq hozir vaziyat o‘zgarganini aytdi. U bu haqda Kentukki shtatidagi nutqida aytib o‘tgan.

Tramp nutqida Vashingtonning Eron bilan yadroviy kelishuvdan chiqqanini eslab o‘tgan. “Prezident lavozimini bajarishga kirishishimdan bir hafta oldin meni bo‘layotgan ishlar bilan tanishtirishgan va Eron bilan bog‘liq masala u butun Yaqin Sharqni qachon o‘z nazorati ostiga olishidan iborat  bo‘lgan. Hozir esa ular bu haqda boshqa o‘ylashmayapti”, deb aytgan Tramp.

“Hozirda ularda kichik halokat yuz bermoqda. Ularning ko‘chalarida isyonlar bo‘lmoqda, milliy valyuta qadrsizlanib ketgan. Ular bir kun yonimizga kelib, balki bunga oz qolgandir, “Biz bitim tuzishni istaymiz”, deb aytishadi. Bu normal holatdir, bu yaxshidir”, deb qo‘shimcha qilgan AQSh prezidenti. Uning ta'kidlashicha, bu “AQShning avvalgi ma'muriyati tuzgan bitimga parodiya emas, balki haqiqiy bitim bo‘lishi kerak”.  

Tramp may oyida AQSh Eron bilan yadroviy kelishuvdan chiqishini e'lon qilgan va Eronga qarshi eski sanksiyalar nafaqat tiklanishi, balki yangilari kiritilishini aytgan. AQShning Eronga qarshi sanksiyalarining birinchi qismi 7 avgustga o‘tar kechasi tiklangan. Qolgan sanksiyalar esa 5 noyabrdan kuchga kiradi.