Turk politsiyachilari saudiyalik jurnalist Jamol Qoshiqchining yo‘qolishi tergovi doirasida Saudiya Arabistonining Istanbuldagi bosh konsulligiga kirishdi. Bu haqda NTV telekanali ma'lum qildi.
Avvalroq ushbu ish bo‘yicha ikki davlat ishchi guruhi birinchi yig‘ilishini o‘tkazgan va shundan keyin konsullikka Saudiya Arabistoni ishchi guruhi a'zolari kirishgan.
Qoshiqchi 2 oktabrda Saudiya Arabistoni konsulligiga kelib, so‘ngra izsiz yo‘qolib qolgan. Turkiya hukumati jurnalist konsullikda o‘ldirilgan bo‘lishi mumkinligini taxmin qilmoqda.
Saudiya Arabistoni hukumatining ta'kidlashicha, jurnalist konsullik binosini tark etgandan keyin yo‘qolib qolgan. Biroq Turkiya prezidenti Rajab Toyyib Erdo‘g‘anning aytishicha, Saudiya Arabistoni jurnalistning yo‘qolishiga aloqador emasligini isbotlashi lozim, hozircha esa uning vajlari ishonarli emas.
