«Barselona» keyingi 20 yildagi eng yomon ko‘rsatkichini qayd etmoqda

Ispaniya chempionatining 12-turida «Barselona» «Betis»ni qabul qildi. «Kamp Nou»da kechgan uchrashuvda maydon egalari 3:4 hisobida yutqazishdi.

Bu o‘yin «Barselona» uchun chempionatda qatorasiga 10-uchrashuvda kamida bitta gol o‘tkazgan o‘yin bo‘ldi. «Barselona» bunday noxush seriyani 1998 yilning sentabridan buyon qayd etmagandi. O‘shanda jamoani Lui van Gaal boshqargan, ko‘k-anorranglilar jamoasi chempionatda qatorasiga 12 o‘yinda o‘z darvozasidan gol o‘tkazgandi.

Shuningdek, bu o‘yin «Barselona» keyingi 15 yil ichida ilk marta «Kamp Nou»da o‘z darvozasidan 4ta gol o‘tkazib yuborgan o‘yin bo‘ldi.

Kataloniyaliklar oxirgi marta 2003 yilning aprelida, «Deportivo»ga qarshi o‘yinda 2:4 hisobida yutqazgandi.

Kataloniyaliklar uchun bugungi o‘yin Ispaniya chempionatida keyingi 6 o‘yindagi ilk mag‘lubiyatli o‘yin bo‘ldi. Bungacha amaldagi chempionlar 3 uchrashuvda g‘alaba qozonib, 2 bor durang o‘ynashgandi. «Betis» esa «Barselona»ni mag‘lub etish orqali 4 uchrashuv davom etgan g‘alabasiz seriyasiga yakun yasadi.

Bundan tashqari, bu mag‘lubiyat kataloniyaliklar jamoasi safida Lionel Messi kamida ikkita gol urgan o‘yinda ilk marta mag‘lub bo‘lishidir.

Endilikda «Barselona» 24 ochko bilan turnir jadvalida peshqadamlik qilmoqda, «Betis» 16 ochkosi bilan 12-o‘rinda joylashgan.