Eng uzoq davom etgan 5ta serial

Televideniye borki seriallar ham bor. Turli yillarda o‘zbek tomoshabinlar «Kanizak Izaura», «Boylar ham yig‘laydi», «Oddiy Mariya», «Esmeralda» kabi seriallar qahramonlarining taqdiri uchun kuyib yonishdi. Ayniqsa, to‘qsoninchi yillarda namoyish etilgan, boshi-yu oxiri yo‘q «Santa-Barbara» o‘zining uzluksizligi bilan abadiy davom etadigandek taassurot qoldirgandi. O‘zbek tomoshabinlari so‘nggi yillarda avval koreys, so‘ngra hind va oxir-oqibat turk seriallarini sevib tomosha qilishyapti. Ammo yuqorida nomi keltirilgan seriallarning birortasi davomiyligi bo‘yicha o‘nlikka ham kirishmaydi.

Yaxshiyamki, quyidagi kuchli beshlik seriallari bizda namoyish etilmagan. Bo‘lmasa, ular har kuni ko‘pchilikning vaqtini bekorga sovurish bo‘yicha qanchadan qancha mojaro-yu shov-shuvlarga sabab bo‘larmidi. Axir, biror serialni tanlash va muntazam tomosha qilish «ancha mas'uliyatli» masala. Chunki, tomoshabin har kuni buning uchun boshqa ishlardan kechib ma'lum vaqt ajratishi, o‘sha qahramonlar uchun kuyunishi zarur-da! Keling, yaxshisi reyting bilan tanishamiz.

5.  «Yosh va cho‘rtkesarlar» (1973 yildan buyon davom etmoqda)

«Yosh va cho‘rtkesarlar» («The Young and the Restless») seriali 1973 yildan boshlab turli telekanallarda, turli vaqtlarda efirga uzatib kelinmoqda. Agnes Nikson muallifligidagi serial voqealari Viskonsin shtatidagi o‘ylab topilgan Genuya Siti shahrida kechadi va badavlat Bruks va kambag‘al Fosterlar oilasining munosabatlari asosida boshlangan. Keyinchalik, o‘zaro raqobatga Nyumenlar va Ebbotlar oilasi qo‘shiladi. Dastlab bu serial haftasiga 5 marta, 30 daqiqadan uzatilgan. 1980 yildan buyon bir soatdan namoyish etilmoqda va yuqori reytinglardan birini egallab turibdi.

4. «Barcha farzandlarim» (1970 – 2011 yillar)

«Barcha farzandlarim» («All My Children») va «Yosh va cho‘rtkesarlar»ning bir umumiy jihati – har ikkisining muallifi Agnes Nikson. Voqealar Pensilvaniyada bo‘lib o‘tadi va serialda jamiyatdagi murakkab masalalarni, masalan, Vetnam urushi muammosini ko‘tarib chiqish maqsad qilingan. Shuningdek, bu serial plastik jarrohlik samarasi va oqibatlarini birinchilardan bo‘lib tushuntirib bergan loyiha hisoblanadi.

3. «Yashash uchun birgina hayot» (1968 – 2012 yillar)

«Yashash uchun birgina hayot» («One Life to Live») serialining muallifi ham Agnes Nikson. Bu serial 1968 yilning 15 iyulidan boshlab ABC telekanalida efirga uzatilgan. Voqealar Llanvyu nomli uydirma shaharda rivoj topadi va asosan, irqiy ziddiyatlar hamda giyohvandlik muammolarini tasvirlaydi. Jami 11 096 seriya ishlangan bo‘lib, ular 29 daqiqadan bir soatgacha davom etgan. 2002 yilda serial «Eng yaxshi dramatik serial» nominatsiyasida «Emmi» mukofotini qo‘lga kiritgan.

2011 yilning 4 aprelida ABC telekanali 43 yil davom etgan loyiha yopilishi haqida e'lon qildi. Serialda turli davrlarda Lourens Fishborn, Tommi Li Jons kabi Hollivud yulduzlari ham ishtirok etishgan.

Darvoqe, bosh qahramon rolini o‘ynagan aktrisa Erika Slezak serialning boshidan oxirigacha – 43 yil rol o‘ynagan.

2. «Dunyo qanday aylanadi? » (1956 – 2010 yillar)

«Dunyo qanday aylanadi?» («As the World Turns») seriali davomiyligi jihatdan kumush medal sohibi hisoblanadi. 1958 yildan 1978 yilga qadar bu serial yuqori reytingni saqlab turish bo‘yicha rekordchi hamdir. Jami 13 858 seriya ishlangan bo‘lib, xronometraji 10 400 soatni tashkil etadi. Efirga uzatilish vaqti bo‘yicha ham bu serial o‘ziga xos: dastlabki seriyalari 30 daqiqadan boshlanib, keyinchalik efir vaqti orta borgan. Bu loyihaga qadar esa seriallar 15 daqiqadan efirga uzatilgan.

Serial voqealari Okdeyl nomli uydirma shaharda kechadi va maishiy muammolar haqida so‘zlaydi.

Qizig‘i, serial 54 yil davomida boshdan-oxir faqat bir shahar – Nyu-Yorkda suratga olingan.

1. «Yo‘lchi yulduz» (1937 – 2009 yillar)

«Yo‘lchi yulduz» («Guiding Light») bu borada mutlaq chempion bo‘lib, hali beri biror loyiha unga yeta olmasa kerak. Chikago yaqinidagi shaharlardan birida kechuvchi voqealar 15 000 seriya davomida tomoshabinlarni jalb qilib turdi va haqli ravishda Ginness rekordlar kitobiga kiritilgan.

Bu serial dastlabki seriyalari radioda boshlanib, keyinchalik teleekranlarga ko‘chgani bilan ham o‘ziga xosdir. Olti oilaning o‘zaro munosabatlari 72 yil davom etganidan so‘nggina nihoyasiga yetdi. CBS kompaniyasi 2009 yilda past reytinglar tufayli loyihani to‘xtatishga qaror qildi va o‘sha yilning 18 sentabrida oxirgi seriya efirga chiqdi.

Ma'lumot uchun: o‘tgan asrning to‘qsoninchi yillarda Rossiya telekanallari orqali namoyish etilgan, bizda ham ko‘pchilik tomosha qilgan «Santa-Barbara» seriali biror jihati bo‘yicha yuqoridagi loyihalar bilan bellasha olmaydi. Chunki serial «bor-yo‘g‘i» 2137 seriya bo‘lib, 1984 yildan 1993 yilga qadar efirga uzatilgan. «Rossiya» telekanali esa bu serialni 1992 yilda 217-seriyasidan (xuddi birinchi seriyadek) boshlab, o‘rtada uzilishlar bilan 2002 yilga qadar efirga uzatgan va baribir oxirigacha namoyish etmagan.