XMT: O‘zbekiston bolalar va majburiy mehnatni oldini olishda ulkan yutuqlarga erishdi

O‘zbekiston paxta dalalarida hosilni yig‘ib terib olishda majburiy mehnatga yo‘l qo‘yish holatlari keskin ravishda kamaygan. Bolalar mehnati borasida esa, oldingi yillarda bo‘lganidek, xavotirga o‘rin qolmagan. Xalqaro mehnat tashkilotining O‘zbekiston dalalarida faoliyat yuritgan kuzatuvchilari shunday fikrda, deb xabar bermoqda KUN.UZ muxbiri. Bu haqda 21 noyabr kuni Wyndham mehmonxonasida bo‘lib o‘tgan tadbirda ma'lum qilindi.

Xalqaro mehnat tashkiloti (XMT) monitorlarining aytishlaricha, O‘zbekistonning aksar paxta dalalarida majburiy mehnatga batamom barham berilgan. 2018 yilda paxta terimiga jalb etilganlarning 93 foizi ixtiyoriy ravishda paxta tergan. Talaba, o‘qituvchi, vrach va hamshiralar paxtaga mutlaqo jalb etilmagan. Shunga qaramay, kuzatuvchilarning qayd etishlaricha, ayrim holatlarda davlat tashkilot va idoralari xodimlari paxtaga chiqarilib, terimda ishtirok etganligi kuzatilgan.

O‘tgan yillarda paxta terimida katta muammo deb e'tirof qilingan bolalar mehnatiga esa butkul barham berilgan.

«2018 yil O‘zbekiston uchun ko‘pgina yo‘nalishlarda sinov bo‘ldi, – deydi XMTning Ish joylarida fundamental tamoyillar va huquqlar byurosi boshlig‘i Beate Andreyes. Bir yil oldin Prezident Mirziyoyev BMT minbaridan turib, hukumat XMT va Jahon banki bilan birgalikda paxta terimida bolalar va majburiy mehnatga barham berish haqida majburiyat olishini ta'kidlab o‘tgan edi. Ushbu siyosiy majburiyatni ro‘yobga chiqarish maqsadida bir qator tuzilmaviy o‘zgarishlar ro‘y berdi va ishchi kuchi yollash borasida islohotlar amalga oshirildi. XMT kuzatuvchilari ushbu chora-tadbirlar o‘z samarasini berganini va odamlar joylarda buni haqiqatda his etayotganini ta'kidladilar».

O‘zbekistonda odamlarni paxta terimiga jalb etish – dunyodagi eng yirik ishga yollash amaliyoti bo‘lib, unda qariyb 2,6 million kishi mavsumiy terim ishlariga jalb etiladi. Garchi so‘nggi yilarda paxta ekin maydonlari qisqartirilgan bo‘lsa-da, ushbu ekin hamon mahalliy aholi, ayniqsa qishloq ayollari uchun qo‘shimcha daromad manbai bo‘lib qolmoqda.