Rossiya va Qozog‘istonning 8 fuqarosi AQShda 36 mln dollarlik internet-firibgarlikni amalga oshirishda ayblanmoqda. Bu haqda Nyu-York prokuraturasi bayonotida ma'lum qilingan.
Ushbu ish bo‘yicha rossiyalik Aleksandr Jukov, Boris Timoxin, Mixail Andreyev, Denis Avdeyev, Dmitriy Novikov, Aleksandr Isayev va qozog‘istonlik Sergey Ovsyannikov hamda Yevgeniy Timchenko o‘tmoqda. Ovsyannikov, Jukov va Timchenko mos ravishda Malayziya, Bolgariya va Estoniyada qo‘lga olingan va AQShga ekstraditsiya qilinishlarini kutmoqdalar. Qolganlar esa ozodlikda qolmoqda.
Ayblov xulosasida ta'kidlanishicha, 2014 yil sentabrdan 2016 yil dekabrgacha davrda Jukov, Timoxin, Andreyev, Avdeyev va Novikov reklama tarmog‘ini (Reklama tarmog‘i № 1) boshqarib, Ovsyannikov ko‘magida reklama bilan raqamli firibgarlik sxemasini amalga oshirishgan.
Ta'kidlanishicha, bu sxema natijasida reklamaning milliardlab marta namoyish qilinishi qalbakilashtirilib, bu uchun kompaniyalardan 7 mln dollardan ko‘proq pul olingan. Aslida esa ushbu reklamani real foydalanuvchilar hech qachon ko‘rishmagan.
“Reklama tarmog‘i №2” deb nomlangan ikkinchi sxema 2015 yil dekabridan 2018 yil oktabrigacha amal qilgan. Uni Ovsyannikov, Timchenko va Isayev boshqargan va yuqoridagi kabi usul bilan 29 mln dollardan ko‘proq daromad olishgan.
