AQSh va Xitoy 1 yanvardan keyin yangi bojlar kiritmaslikka kelishib oldi

Xitoy raisi Si Tszinpin va AQSh prezidenti Donald Tramp Buenos-Ayresdagi muzokaralarga ko‘ra, 1 yanvardan keyin o‘zaro yangi bojlar kiritmaslikka kelishib oldi.

Tramp Xitoy mahsulotlariga nisbatan bojni 10 foizdan 25 foizga ko‘tarmaslikka rozi bo‘lgan.

Shu tariqa, Xitoyning yiliga 200 mlrd dollarlik mahsulotlari uchun boj 10 foiz miqdorida saqlanib qoladi.

AQSh agar keyingi 90 kun ichida Xitoy bilan ba'zi savdo masalalari bo‘yicha kelishuvga kelinmasa, bojlar 25 foizgacha ko‘tarilishidan ogohlantirgan.

Xitoy, o‘z navbatida, savdo disbalansini qisqartirish uchun AQShdan katta miqdorda qishloq xo‘jaligi va boshqa mahsulotlar sotib olishga rozi bo‘ldi.  

“Xitoy AQShdan qishloq xo‘jaligi, energetika, sanoat va boshqa mahsulotlarni sotib oladi”, deyilgan xabarda.

Ta'kidlanishicha, Xitoy amerikalik fermerlarning mahsulotlarini “darhol” sotib olishga rozilik bergan.