YeXHT Rossiya va G‘arb davlatlari o‘rtasida ishonch butkul yo‘qolganini bildirdi

Yevropada xavfsizlik va hamkorlik tashkiloti (YeXHT) mintaqadagi xavfsizlik bilan bog‘liq vaziyat hamda Rossiya va AQSh, shuningdek G‘arb davlatlari o‘rtasida ishonch mutlaqo yo‘qolganidan tashvishlanmoqda. Bu haqda tashkilot bosh kotibi Tomas Greminger Neue Zürcher Zeitung gazetasiga bergan intervyusida aytdi. 

«Umuman olganda, Yevropadagi xavfsizlik bilan bog‘liq vaziyat tashvish uyg‘otmoqda», dedi u.

Uning so‘zlariga ko‘ra, Yevroatlantika xavfsizligining asosiy o‘yinchilari bo‘lgan Rossiya va AQSh hamda boshqa G‘arb davlatlari o‘rtasida butkul ishonchsizlik hukm surmoqda.

Gremingerning ta'kidlashicha, «Boltiq dengizi ustida samolyotlar yoki Boltiqbo‘yida kemalar bir-biriga xavfli darajada yaqinlashmoqda, deyarli to‘qnashmoqda». 

U YeXHT qanday bo‘lmasin harbiy xatarlarni nazorat ostiga olishi va ularni qisqartirishi kerakligini, chunki vaziyat keskinlashishi uchun birgina uchqun yetarli ekanligini bildirdi.