2019 yilda maktablarni qurish va ta'mirlash uchun qariyb 1 trillion so‘m yo‘naltiriladi

O‘zbekiston Respublikasi prezidenti Shavkat Mirziyoyev 2018 yil 19 dekabr kuni “O‘zbekiston Respublikasining 2019 yilga mo‘ljallangan Investitsiya dasturini amalga oshirish chora-tadbirlari to‘g‘risida”gi PQ-4067-sonli qarorini imzoladi.

Xalq ta'limi vazirligi axborot xizmati xabariga ko‘ra, qaror bilan 2019 yilda umumta'lim maktablarini qurish, rekonstruksiya qilish, mukammal ta'mirlash va jihozlash bo‘yicha manzilli dasturi ham tasdiqlanib, 975 mlrd. so‘mlik mablag‘ ajratildi.

Manzilli dastur doirasida 506 ta obekt qurish, rekonstruksiya qilish, mukammal ta'mirlash va jihozlash ko‘zda tutilgan. Jumladan, 22 ta yangi maktab qurilishi uchun 2019 yilda 128,97 mlrd. so‘m yo‘naltirish ko‘zda tutilgan. Maktablarning rekonstruksiyasi uchun 453,49 mlrd. so‘m va kapital ta'mirlash uchun 252,5 mlrd. so‘m ajratilgan.

Dastur doirasida maktablarni qurish, rekonstruksiya qilish, mukammal ta'mirlash va jihozlash uchun Qoraqalpog‘iston Respublikasida 44,4 mlrd. so‘m, Andijon viloyatida 74,44 mlrd. so‘m, Buxoro viloyatida 33,91 mlrd. so‘m, Jizzax viloyatida 40,62 mlrd.so‘m, Qashqadaryo viloyatida 86,2 mlrd.so‘m yo‘naltirish rejalashtirilgan.

Namangan viloyatida ushbu maqsadlarga 74,54 mlrd.so‘m, Navoiy viloyatida 24,54 mlrd.so‘m, Samarqand viloyatida 97,85 mlrd.so‘m, Sirdaryo viloyatida 24,10 mlrd. so‘m, Surxondaryo viloyatida 70,81 mlrd. so‘m, Toshkent viloyatida 73,77 mlrd. so‘m, Xorazm viloyatida 52,27 mlrd. so‘m, Farg‘ona viloyatida 74,28 mlrd. so‘m, Toshkent shahrida 63,2mlrd. so‘m mablag‘lar yo‘naltirish rejalashtirilgan.