Nyu-Yorkda uch kun liftda qamalib qolgan ayol qutqarildi. Bu haqda Associated Press axborot agentligi xabar berdi.
O‘t o‘chiruvchilar qutqarish xizmatiga qo‘ng‘iroqdan keyin milliarder Uorren Stivens uyiga yetib kelishgan. Ular uyning 2- va 3-qavatida to‘xtab qolgan liftni ochishganda u yerda farrosh ayolni topishgan.
Ayolning aytishicha, u liftda 25 yanvarda qamalib qolgan. Milliarder va uning yaqinlari dam olish kunlari ketishgan va shu sababli yordamga keladigan odamning o‘zi bo‘lmagan. Ayol liftda suvsiz va yeguliksiz uch kun qolib ketgan. U 28 yanvar ertalab topilganda tashnalikdan kuchsizlangan holda bo‘lgan.
Ayol shifoxonaga yetkazilgan, hozirda uning ahvoli yaxshilanmoqda. Stivensning oilasi ayol tuzalayotganidan yengillik his qilgan va bunday holatlar takrorlanmasligi uchun choralar ko‘rishga va'da bergan.
Uorren Stivens Stephens Inc. investitsion bankiga rahbarlik qiladi. Uning boyligi 2,4 mlrd dollarga baholanadi. Ta'kidlanishicha, ayol milliarderning oilasida 18 yildan beri ishlab keladi.
