«Eronni kuzatishni istayman»: Tramp nega Iroqda qo‘shinlar qoldirilishini aytdi

AQSh prezidenti Donald Tramp qo‘shni Eronni kuzatish va bosim o‘tkazish uchun Iroqda Amerika qo‘shinlarini saqlab qolishni rejalashtirmoqda. Bu haqda Amerika yetakchisi CBS News’ga intervyusida ma'lum qildi.

«Men Eronni kuzatishni xohlayman», - dedi Tramp 3 fevral kungi efirda.

AQSh prezidentining so‘zlariga ko‘ra, qo‘shinlar Eronni shu tariqa kuzatishi mumkin, agar «muammolar yoki kimdir yadroviy qurol yaratmoqchi bo‘lsa», Vashington bu haqda birinchi bo‘lib biladi.

«Iroqda biz ajoyib va qimmat harbiy bazani qurdik. U tinch bo‘lmagan Yaqin Sharqning turli qismlarini kuzatib borish uchun mukammal joylashuvga ega», - dedi Tramp.

Uning so‘zlariga ko‘ra, bazani saqlab qolishni istayotganiga sabablardan biri - «Eronni biroz kuzatib turish, chunki Eron - bu haqiqiy muammo».

Biroq, Tramp Iroqda AQSh qo‘shinlarining bo‘lishi xato ekanini tan olgan.

Iroq prezidenti Barham Solih amerikalik hamkasbi Donald Trampning so‘zlariga munosabat bildirdi. Bu haqda Reuters xabar qilmoqda.

Iroq prezidentining so‘zlariga qaraganda, Tramp Iroq tomoni qo‘shinlarni joylashtirishga rozi bo‘lishi yoki bo‘lmasligi bilan qiziqmagan. Uning bildirishicha, ayni paytda Amerika qo‘shinlari terrorizmga qarshi kurashish uchun Iroq hududida bo‘lishiga ruxsat beruvchi, davlatlar o‘rtasida bitim imzolangan.