Samarqand shahrida o‘z ota-onasini urgan o‘g‘ilga sud hukmi o‘qildi

Samarqand shahridagi mahallalardan birida istiqomat qilib kelayotgan sudlanuvchi Qosim To‘xtayev (ismlar o‘zgartirilgan) 2016 yili ham JKning 105-moddasi (Qasddan badanga o‘rtacha og‘ir shikast yetkazish) bilan sudlangan, JKning 71-moddasiga asosan, o‘z qilmishiga amalda pushaymon bo‘lganligi munosabati bilan jazodan ozod etilgan edi. Lekin baribir «o‘rgangan ko‘ngil o‘rtansa qo‘ymas», deganlaridek yana o‘z yaqiniga qo‘l ko‘tarib, tan jarohati yetkazishdek qabih ishga qo‘l urdi.

Yana kimga deng — tarbiyalab voyaga yetkazgan o‘z ota-onasiga!

Ota-onasi mehribonlik uyidan asrab olib, tarbiyalab voyaga yetkazgan Qosim To‘xtayev 2015 yildan buyon tutingan ota-onasi bilan kelishmaydi. O‘sha kuni uyidan ko‘chaga chiqib ketayotganida onasi Mahliyo To‘xtayeva (ism-familiya o‘zgartirilgan) uning o‘g‘ilchasini kiyintirayotgan edi. Shunda u qizalog‘iga qarata: «haromilarga ayt, ukangga tegishmasin», deydi. Bu haqorat ota-onasiga qaratilgan edi!

Ne-ne umidda katta qilgan farzandidan bu qadar og‘ir so‘z eshitganiga chiday olmagan otasi Muxtor To‘xtayev (ism-familiya o‘zgartirilgan) o‘g‘liga yuzlanib, «Og‘zingga qarab gapir! Axir biz sening ota-onangmiz! Sendan nima muttahamlik joyimiz bor?» — deydi.

Bu gapdan so‘ng nobakor o‘g‘il otani har xil so‘zlar bilan haqorat qilib, uni oldiga yaqinlasha boshlaydi. Ota o‘g‘liga «hozir IIBga xabar beraman», deb ogohlantiradi, o‘g‘il esa IIB xodimlarini ham haqorat qila boshlaydi. Katta nabirasi kelib otasiga qarab «bobomni haqorat qilmang», deb, unga yaqinlashmasligini aytib ularni ajratmoqchi bo‘lganida, o‘g‘li to‘satdan boshi bilan uning burniga zarba berib, chap qo‘lini qayiradi va ota yerga bukchaygancha o‘tirib qoladi. Onasi Mahliyo opa erining burnini qonaganini ko‘rib, o‘g‘ilga tanbeh bera boshlaganida u onasiga ham qo‘l ko‘tarib, uning chap ko‘ziga uradi. Shundan so‘ng mazlum ota-ona IIB xodimlariga xabar berishga majbur bo‘lishadi.

Sudya A.Oltiboyevning raisligida o‘tgan Samarqand shahar sudining ochiq sayyor sud majlisida aybdor, jabrlanuvchi va guvohlarlarning ko‘rsatmasi tinglanib, hukm e'lon qilindi.

Garchi sudlanuvchi o‘z qilmishidan chin ko‘ngildan pushaymon ekanligi yengillashtiruvchi holat, deb topilgan esa-da, ushbu jinoyatni qasddan sodir etgani og‘irlashtiruvchi holat o‘laroq baholandi hamda Qosim To‘xtayev O‘zbekiston Respublikasi Jinoyat kodeksining 109-moddasi 2-qismida nazarda tutilgan jinoyatlarni sodir etganlikda aybdor, deb topildi va unga 1 yil ozodlikni cheklash jazosi tayinlandi.