Qozog‘iston - Rossiya chegarasida O‘zbekistonning uch nafar fuqarosi qo‘lga olindi

O‘zbekistonning uch fuqarosi Qozog‘iston-Rossiya chegarasini avtomobilda yashirinib olgan holda kesib o‘tishga urindi. Bu haqda Kazakhstan Today xabar bermoqda.

2019 yil 5 mart kuni, soat taxminan 02:00da, Ural chegara otryadining «Sirim-Avto» chegara nazorati bo‘limi Toshkent-Samara yo‘nalishi bo‘ylab harakatlangan navbatdagi avtotransport vositasini (Rossiyaning 1954 yilda tug‘ilgan fuqarosi boshqaruvidagi «Gazel» avtomashinasi) tekshira turib, tashqi va ichki o‘lchovlarning mos kelmasligi, shuningdek, kuzov ichida yangi qoplama mavjudligiga e'tibor qaratgan. Chegara naryadi xodimlari maxsus texnik vositalar yordamida transportni chuqur tekshirib ko‘rishga qaror qilishdi.

«Tekshiruv natijasida kuzovning old qismida qo‘shimcha to‘siq borligi aniqlandi, u ochilganida O‘zbekiston Respublikasining uch nafar fuqarosi yashirinib olgan maxsus maxfiy joy topildi. Buning sababi - Rossiya Federatsiyasi hududiga kirish uchun cheklovlar mavjudligi», - deya qayd etdi Qozog‘iston Milliy xavfsizlik qo‘mitasi Chegara xizmati matbuot xizmati.

Ro‘y bergan voqea to‘g‘risida tegishli organlarga ma'lumot berildi. Qo‘lga olingan fuqarolar haydovchi bilan birgalikda Bayterek tumani IIB xodimlariga topshirilgan.