Tailand janubida bir qator portlashlar sodir etildi

Tailand janubidagi Satxun va Pxattxalung viloyatlarida 9 va 10 mart kunlari 7 ta qo‘lbola bomba portlagan. Xavfsizlik kuchlari tomonidan shu viloyatlarda yana 7 ta bomba topilgan. Portlashlar oqibatida hech kim jabrlanmagan.

Politsiyaning fikricha, bombalarni qo‘yish ortida qo‘shni viloyatlarda harakat qiluvchi ayirmachi jangarilar, siyosatchilar yoki jinoiy to‘dalar turgan bo‘lishi mumkin. 

Satxun va Pxattxalung Tailandning tarkibiga Yalla, Narativat va Pattani viloyatlari kiruvchi “eng janubiy” hududiga kirmaydi. Bu hududda Tailand tarkibiga XX asr boshida kirgan Pattani yarim mustaqil sultonligi uchun muxtoriyatni talab qiluvchi ayirmachi musulmonlar jangovar guruhlari harakat qiladi. 2004 yildan boshlab hududda jangarilar va hukumat kuchlari o‘rtasida muntazam ravishda otishmalar va portlashlar sodir bo‘lib turadi, biroq qo‘shni viloyatlarga ayirmachilar faolligi tarqalmagan. 

Ayni vaqtda Tailandda 2014 yildagi harbiy to‘ntaruvdan keyingi ilk parlament saylovlari bo‘yicha kampaniya o‘tmoqda. Bu saylovlar 24 martga belgilangan va portlashlar ehtimol ayirmachilar faolligi bilan emas, balki siyosiy maqsadlar bilan ham bog‘langan bo‘lishi mumkin.

Shuningdek, oxirgi oylarda politsiya va xavfsizlik kuchlari mamlakat janubida narkotrafik va odam savdosiga qarshi bir nechta muvaffaqiyatli operatsiyalar o‘tkazgan va portlashlar uyushgan jinoiy to‘dalarning harbiylar va politsiyadan o‘ch olishi bo‘lishi ham mumkin.