Qozog‘iston poytaxti Nur-Sulton nomini oladigan bo‘ldi

Qozog‘iston poytaxti Ostona maslihati poytaxtning mamlakatning birinchi prezidenti Nursulton Nazarboyev sharafiga Nur-Sulton deb qayta nomlanishi qarorini qo‘llab-quvvatladi. Bu haqda Tengrinews.kz nashri xabar berdi.  

“Shahar akimati prezidentning buyuk zamondoshimiz, Birinchi Prezident – Elboshi Nursulton Abishevich Nazarboyev nomining abadiylashtirilishi taklifini to‘liq qo‘llab-quvvatlaydi. Bizga shahar aholisi, mehnat jamoalaridan bu tashabbus qo‘llab-quvvatlangan maktublar kelmoqda. Misol uchun, ijtimoiy tarmoqlarda fuqarolardan biri “poytaxtning yangi nomi shaharning yangi g‘alabalari boshlanishi bo‘lishi”ni yozgan maktub keldi. “Nursulton – kuchli nom” deb yozilibdi maktubda. Akimat davlatning yangi rahbari tashabbusini qizg‘in qo‘llab-quvvatlaydi. Biz sizga ham prezident Toqayevning tashabbusini qo‘llab-quvvatlashni taklif qilamiz”, deb murojaat qilgan shahar rahbari Baxit Sultanov malihat deputatlariga murojaatida.    

Shu munosabat bilan deputatlar navbatdan tashqari sessiyada Qozog‘iston poytaxti Ostonaning Nur-Sulton deb o‘zgartirilishi qarorini qo‘llab-quvvatlashgan. 

Maslihat deputati Zaura Jusupovaning aytishicha, bu taklif respublika onomastik komissiyasi bilan muvofiqlashtirilishi kerak.

Ostonaning Nur-Sultonga o‘zgartirilishini Qozog‘istonning yangi prezidenti Qosim-Jo‘mart Toqayev yangi lavozimiga kirishish vaqtidagi qasamyod keltirishdan keyin taklif qilgan.    

“Buyuk zamondoshimiz – Qozog‘iston Respublikasi Birinchi Prezidenti Nursulton Abishevich Nazarboyevning nomini quyidagicha abadiylashtirish kerak: poytaxtimiz Prezidentimiz ismini olib, Nur-Sulton deb nomlanishi lozim. Shuni qo‘shimcha qilishni istardim, bu taklif Qozog‘iston mustaqilligining 25 yilligi munosabati bilan 2016 yil 23 noyabrda parlamentchilar tomonidan qabul qilingan deklaratsiyada ham bildirilgan”, deb aytgan Toqayev.