Saida Mirziyoyeva «Ostona» xalqaro moliya markazi faoliyati bilan tanishdi

Saida Mirziyoyeva Qozog‘iston poytaxtiga tashrifi doirasida «Ostona» xalqaro moliya markazi faoliyati bilan tanishib, moliyaviy infratuzilmani rivojlantirish va investitsiyalarni jalb qilish borasidagi tajribani o‘rgandi.

Saida Mirziyoyevaning ta’kidlashicha, O‘zbekistonda Toshkent xalqaro moliya markazini tashkil etish bo‘yicha ishlar olib borilayotgan bir paytda Qozog‘istonning mazkur sohadagi tajribasini o‘rganish alohida ahamiyat kasb etadi.

Qayd etilishicha, «Ostona» xalqaro moliya markazi xorijiy investitsiyalarni jalb qilish, xalqaro moliyaviy xizmatlar bozorini rivojlantirish va biznes uchun qulay muhit yaratish borasida mintaqadagi muhim platformalardan biri hisoblanadi.

Shuningdek, o‘zaro tajriba almashish nafaqat O‘zbekiston va Qozog‘iston, balki butun Markaziy Osiyo mintaqasiga investitsiyalar oqimini ko‘paytirishga xizmat qilishi ta’kidlandi.