Yirik miqdordagi avtomobil ehtiyot qismlari hujjatdan «tushib» qolgani fosh etildi

Buxoro viloyati bojxonachilari yurtimizga tovar-moddiy boyliklarini noqonuniy olib kirishga bo‘lgan urinishga chek qo‘yishdi.

Xususan, “Olot” chegara bojxona posti xodimlari tomonidan xorijiy davlatdan ushbu bojxona postiga kirib kelgan yuk avtomashinasi belgilangan tartibda “Rapiskan M-60” inspeksion ko‘rik majmuasida skaner qilinib, tasvirlar o‘rganilganda, yukxonadagi yuklarning miqdori hujjatlarda ko‘rsatilganidan ko‘pligi ma'lum bo‘ldi.

Shundan so‘ng, ushbu avtomashinani bojxona nazoratidan o‘tkazish jarayonida, yuk kuzatuv hujjatlarida ko‘rsatilmagan, umumiy qiymati 503,2 million so‘mlik tovarlar borligi aniqlandi. Mazkur tovarlarning asosiy qismini avtomobil ehtiyot qismlari tashkil etishi ma'lum bo‘ldi.

Hozirda ushbu tovarlar vaqtincha saqlovga olingan bo‘lib, holat yuzasidan tergov harakatlari olib borilmoqda.