«Raqobat to‘g‘risida» va «Tabiiy monopoliyalar to‘g‘risida»gi qonunlar birlashtirilishi mumkin

Monopoliyadan chiqarish qo‘mitasida yangi tahrirdagi «Raqobat to‘g‘risida»gi qonun loyihasi muhokama qilina boshladi, deb yozmoqda Norma.

Yangi tahrirda ikkita: «Raqobat to‘g‘risida» va «Tabiiy monopoliyalar to‘g‘risida»gi qonunlarni qo‘shib yuborish nazarda tutilgan.
 
Qo‘mita mutaxassislari amaldagi qonun hujjatlarida nazarda tutilmagan alohida moddalarni kiritishni taklif qildilar:
 
• raqobat prinsiplari;
• davlat ko‘magi, monopsoniya (bozordagi vaziyat, bunda yagona xaridor ko‘plab sotuvchilar bilan hamkorlik qilib, ulardagi narx va sotish hajmini belgilaydi, tahr.) tushunchasining joriy etilishi;
• raqamli bozorlar;
• savdo faoliyatini monopoliyaga qarshi tarzda tartibga solish;
• monopoliyaga qarshi komplayens (tahdidlarga qarshilik qilish va xatarlarni boshqarish tizimi).
 
Qo‘mita biznes-muhit, ilmiy doiralar, ekspertlar hamjamiyati, jamoat va xalqaro tashkilotlar vakillarini ham mazkur qonunni takomillashtirishda ishtirok etishga chorlagan.