Shimoliy Koreya yetakchisi sanksiyalarga zarbalar bilan javob berishga chaqirdi

Shimoliy Koreya yetakchisi Kim Chen In mamlakatga ta'sir qilish uchun sanksiyalar qo‘llayotganlarga zarbalar berishga chaqirdi. Janubiy Koreyaning Yonhap axborot agentligi xabar berishicha, Kim Chen In bunday bayonotni Pxenyanda 10 aprelda o‘tgan Koreya mehnat partiyasi markaziy qo‘mitasi sessiyasida bergan.

“Biz rivojlanayotgan sotsialistik iqtisodiyot bayrog‘ini izchil ko‘tarib, bizni sanksiyalar bilan tiz cho‘ktira olaman deb xato o‘ylayotganlarga zarbalar berishimiz lozim”, deb aytgan Kim Chen In. 

Uning ta'kidlashicha, sanksiyalar solinishi “Shimoliy Koreya hukumati tomonidan o‘z kuchlariga tayanib siyosat yuritayotganining to‘g‘riligini isbotlaydi”, bunday siyosatda milliy iqtisodiyot o‘z texnologiyalari va zaxiralariga tayanishi hamda mustaqil bo‘lishi kerak. 

Yonhap’ning ta'kidlashicha, Kim Chen In bu haqda AQSh va Janubiy Koreya prezidentlarining Vashingtondagi uchrashuvi arafasida aytib o‘tdi. 11 aprelda o‘tadigan uchrashuvda tomonlar Shimoliy Koreya yadro masalasini hal qilish yo‘llarini muhokama qilishlari kutilmoqda.