Mindich Zelenskiy ustidan sudga shikoyat qildi

Ukraina Kassatsiya ma’muriy sudi ma’lumotiga ko‘ra, Mindichning da’vo arizasi ish yurituviga qabul qilingan. Ishni ko‘rib chiquvchi sud hay’ati 14 may kuni shakllantirilgan.

Da’voda javobgar sifatida Ukraina prezidenti Volodimir Zelenskiy, Milliy xavfsizlik va mudofaa kengashi hamda Iqtisodiyot, atrof-muhit va qishloq xo‘jaligi vazirligi ko‘rsatilgan.

Timur Mindich “Ukrainskaya pravda” nashriga bergan intervyusida o‘zini aybsiz deb hisoblashini aytgan. “Meni qilmagan ishlarimda ayblashmoqda”, — degan u.

Timur Mindich Ukrainadagi “Energoatom” davlat energetika kompaniyasi atrofidagi yirik korrupsiya mojarosining asosiy figurantlaridan biri hisoblanadi.

Ukraina Milliy antikorrupsiya byurosi va Ixtisoslashtirilgan antikorrupsiya prokuraturasi 2025 yil noyabr oyida “Energoatom” atrofidagi korrupsion sxemani fosh qilganini ma’lum qilgan. Tergov versiyasiga ko‘ra, kompaniya kontragentlaridan shartnoma summasining 10–15 foizi miqdorida pora talab qilingan.

Mazkur ish doirasida bir qator amaldorlar va Timur Mindich tilga olingan. Tergov ma’lumotlariga ko‘ra, biznesmen energetika sohasidagi amaldorlarga ta’sir o‘tkazgan bo‘lishi mumkin.

Antikorrupsiya organlari Mindich va o‘sha vaqtdagi adliya vaziri German Galushchenko uyida tintuv o‘tkazgan. Biroq biznesmen tintuvdan bir necha soat oldin Ukrainadan chiqib ketgani aytilmoqda.

Korrupsiya mojarosidan keyin Ukraina Milliy xavfsizlik va mudofaa kengashi Isroil fuqarosi bo‘lgan Timur Mindich va tadbirkor Aleksandr Tsukermanga qarshi sanksiyalar joriy qilishga qaror qilgan. Zelenskiy 13 noyabr kuni bu qarorni farmon bilan kuchga kiritgan.

Sanksiyalar doirasida Mindich davlat mukofotlaridan mahrum qilingan, uning aktivlari muzlatilgan. Shuningdek, unga savdo operatsiyalarini amalga oshirish, apitalni xorijga olib chiqish, xususiylashtirishda ishtirok etish, Ukraina radiochastotalaridan foydalanish, davlat va mudofaa xaridlarida qatnashish hamda yer uchastkalari sotib olish taqiqlangan.