Shimoliy Koreya bir nechta turdagi raketalarni sinovdan o‘tkazdi

Qayd etilishicha, raketalar sinovi mamlakat rahbari Kim Chen In kuzatuvi ostida o‘tkazilgan. Janubiy Koreyaning Yonhap agentligi xabariga ko‘ra, bir kun avval Janubiy Koreya harbiylari Shimoliy Pxyonan viloyatidagi Chonju hududidan Sariq dengiz tomon bir nechta qisqa masofali ballistik va artilleriya raketalari uchirilganini qayd etgan.

KMTA ma’lumotiga ko‘ra, 26 may kuni o‘tkazilgan sinovlar KXDR milliy mudofaa tizimini rivojlantirish bo‘yicha besh yillik rejaning bir qismi hisoblanadi. Unga ko‘ra, artilleriya va raketa qo‘shinlarini modernizatsiya qilish maqsad qilingan.

Kim Chen In sinov natijalaridan “katta mamnuniyat” bildirgan va buni mamlakatning harbiy ustunligi hamda jangovar salohiyati ortib borayotganining “yaqqol signali” deb atagan.

Ayniqsa, u janubiy chegara yaqinidagi uzoq masofali artilleriya bo‘linmalariga joylashtirilishi rejalashtirilgan taktik qanotli raketani yuqori baholagan.

Ma’lum qilinishicha, ushbu raketa yer rel’yefini xaritalash va sun’iy intellekt asosida nishonga yo‘naltirish kabi bir nechta navigatsiya tizimlari bilan jihozlangan. Bu esa unga 100 kilometr radiusdagi nishonlarni yuqori aniqlik bilan urish imkonini beradi.