8518.68 USD +5.11

9652.52 EUR +145.42

131.33 RUB +0.92

10847.7 GBP +94.20

12:30 / 13.06.2019 13112

Соғлиқни сақлаш вазирлиги «Фарҳод» бозори ҳудудида рўй берган ҳолат бўйича изоҳ берди

Соғлиқни сақлаш вазирлиги шу кунларда ижтимоий тармоқларда тарқалган «Фарҳод» деҳқон бозори ҳудудида кекса ёшли бир аёлнинг тоби қочгани ва чақирилган «Тез ёрдам» кечикиб келгани туфайли бемор шифохонада вафот этгани ҳақида хабарлар юзасидан муносабат билдирди.

Маълум бўлишича, 2019 йил 8 июнь куни соат 10:24 ва 10:34 оралиғида Тошкент шаҳар тез тиббий ёрдам станцияси Call марказига алоҳида-алоҳида иккита қўл телефонидан қўнғироқ бўлади ва улардан бири ёши 50-60, иккинчиси 60-70лар оралиғида аёлнинг «Фарҳод» деҳқон бозори ҳудудида соғлиғи ёмонлашганини маълум қилади. Ушбу маълумот зудлик билан Учтепа тумани 4-подстанциясига етказилиб, воқеа жойига «Тез ёрдам» бригадаси жўнатилади. Навбатчи диспетчер вазиятни ўрганиш мақсадида соат 10:44ларда қўнғироқ қилганида «Тез ёрдам» манзилга етиб бориб, беморга биринчи ёрдам кўрсатаётган бўлади.

Бироқ соат 10:59да «Фарҳод» бозоридан яна телефон бўлиб «Тез ёрдам» кутишаётганини маълум қилишади. Шунда бозор ҳудудида иккита бемор борлиги маълум бўлади ва зудлик билан бошқа «Тез ёрдам» бригадаси жўнатилади. Аммо «Тез ёрдам» боргунича бемор йўловчи машинада шифохонага олиб кетилган бўлади.

«Бозорлар, чорраҳалар, жамоат жойларида бирор бахтсиз ҳодиса рўй берса ёки кимнингдир тоби қочиб қолса, одатда воқеага гувоҳ бўлган йўловчилар «Тез ёрдам» чақиради. Бундай мурожаатларда кўпинча тез тиббий ёрдамга муҳтож беморлар бозорнинг ёки чорраҳанинг қайси бурчагида эканлиги аниқ кўрсатилмайди. Аксарият ҳолларда телефон қилган одам ҳам воқеа жойидан кетиб қолади.

Натижада «Тез ёрдам» машинаси беморни тополмай овора-ю сарсон бўлади, бемор топилгунча анча вақт йўқотилади. Кўпчилик ҳолларда бундай чақириқларда беморларни топиш имконияти бўлмайди», — дейди Тошкент шаҳар тез тиббий ёрдам станцияси бош шифокори Даврон Султонов.

«Айтиш жоизки, бугунги кунда Тошкент шаҳар тез тиббий ёрдам станциясида 179та тез тиббий ёрдам бригадаси аҳолига хизмат кўрсатяпти. Тизимда 705 нафар шифокор ва 1150 нафар ўрта тиббий ходимлари ҳамда диспетчерлар фаолият юритяпти. Ушбу тез тиббий ёрдам бригадаларига кунига ўртача 3000га яқин (куз-қиш мавсумларида чақириқлар 4000дан ҳам ошади) чақириқ тушади. Уларга ўз вақтида бориб тиббий ёрдам кўрсатиляпти.

Тез тиббий ёрдам хизматининг муҳим бўғини бўлган Call- марказлар фаолияти ҳам такомиллашяпти. Тошкент шаҳар тез тиббий ёрдам станция таркибидаги шундай марказда 2 нафар шифокор, 36 нафар ўрта тиббий ходим – диспетчерлар аҳолидан тушган қўнғироқларни қабул қиляпти. Ушбу тиббиёт ходимлари қўнғироқни қабул қилиш баробарида беморнинг яқинларига биринчи ёрдам кўрсатиш йўлларини ҳам уқтиради. Зеро, беморга шошилинч вазиятда токи шифокор етиб келгунича аниқ ва тўғри кўрсатилган биринчи ёрдамнинг инсон ҳаётини асрашда ўрни ниҳоятда муҳим», дейилади Соғлиқни сақлаш вазирлиги Жамоатчилик билан алоқалар бўлими хабарида.

Top