O‘zbekiston jamoasi Xalqaro armiya o‘yinlarining “Elbrus halqasi-2019” tanlovi doirasida Yevropa va Rossiyaning eng baland tog‘ cho‘qqisi – Elbrusga (5642 metr) birinchi bo‘lib ko‘tarildi. Tanlovda 5 ta davlat harbiylari ishtirok etgan.
Ma'lum qilinishicha, tanlovning yakuniy bosqichida o‘zbekistonlik harbiylarga tayanch lager Priyut 11dan (balandligi 4,2 ming metr) cho‘qqiga ko‘tarilish uchun 4 soat 25 daqiqa talab qilingan. Cho‘qqiga ikkinchi bo‘lib qozog‘istonlik harbiylar, uchinchi bo‘lib Hindiston, to‘rtinchi bo‘lib Rossiya harbiylari ko‘tarilishgan.
“Elbrus halqasi” tanlovida umumiy hisobda Rossiya 14 ta topshiriqdan 9 tasida g‘alaba qozonib, 1-o‘rinni egalladi.
16 avgust Terskol qishlog‘idagi Tog‘ tayyorgarligi bazasida tanlovning tantanali yopilishi marosimi bo‘lib o‘tadi va g‘oliblar mukofotlanadi.
Eng yaxshi tog‘ bo‘limi uchun “Elbrus halqasi” tanlovi 3 avgustda boshlangandi. Unda O‘zbekiston, Rossiya, Qozog‘iston, Marokkash va Hindiston harbiylari ishtirok etgan.
Xalqaro armiya o‘yinlari (ArMi) 3 avgustdan 17 avgustgacha 10 ta davlat hududida bo‘lib o‘tmoqda. Umumiy hisobda 32 ta tanlov o‘tkazilib, ularda 200 dan ko‘proq jamoa ishtirok etmoqda.
