Saida Mirziyoyeva: yaponiyalik jahonga mashhur arxitektor O‘zbekiston Davlat san'at muzeyini rekonstruksiya qilishning dizayn konsepsiyasini yaratadi 

Yaponiyalik jahonga mashhur arxitektor, Pritsker mukofoti sohibi Tadao Ando O‘zbekiston Davlat san'at muzeyini rekonstruksiya qilishning dizayn konsepsiyasini yaratadi. Bu haqda O‘zbekiston Prezidenti Administratsiyasi huzuridagi Axborot va ommaviy kommunikatsiyalar agentligi direktori o‘rinbosari Saida Mirziyoyeva o‘zining Feysbukdagi sahifasida ma'lum qildi.

Uning qayd etishicha, tegishli shartnoma O‘zbekiston Madaniyat vazirligi huzuridagi Madaniyat va san'atni rivojlantirish jamg‘armasi tomonidan 26 avgust kuni Osaka shahrida imzolandi.

Mirziyoyevaning ma'lumot berishicha, Ando zamonaviy binolarni loyihalashtirishda o‘ziga xos milliy estetik jihatlarni qo‘llaydi. Me'morning eng taniqli ishlari orasida Italiya, Fransiya, AQSh, Yaponiyadagi teatrlar, muzeylar va san'at markazlari dizaynlari bor.